“İNEPO-AVRASİYA” Ətraf Mühitin Mühafizəsi Olimpiadasının iştirakçıları üçün “SOCAR Günü” təşkil olunmuşdur
Xəbər verildiyi kimi, 6-7 aprel 2012-ci il
tarixlərində ARDNŞ-nin dəstəyi, Təhsil Nazirliyi, Ekologiya və Təbii Sərvətlər
Nazirliyi, İctimai Televiziya, ''Çağ'' Öyrətim İşlətmələri Şirkəti və ''İNEPO-AVRASİYA''
Ekologiya İctimai Birliyinin birgə təşkilatçılığı ilə Bakıda ''INEPO-EUROASIA''
Ətraf Mühitin Mühafizəsi VI Beynəlxalq Layihə Olimpiadası keçirilcəkdir.
Aprelin
4-də ARDNŞ prezidenti Rövnəq Abdullayev olimpiada iştirakçıları ilə görüşmüş, onlara
uğurlar arzulamışdır. Aprelin 5-də olimpiada çərçivəsində “SOCAR Günü” təşkil
edilmişdir. Tədbir olimpiada iştirakçılarının Suraxanı rayonunda yerləşən
“Atəşgah”a ziyarəti ilə başlanmış, daha sonra iştirakçılar ''Ekoloji Park''da
olmuşlar.
Abşeron yarımadasında ekoloji vəziyyətin normallaşdırılması üçün
yaşıllıq zolaqlarının artırılması, buradakı iqlim şəraitinə uyğunlaşa bilən
ekzotik ağac-kol və dekorativ bitkilərin becərilməsi, Abşeronun nəsli kəsilmək
təhlükəsi olan nadir bitkilərindən ibarət kolleksiyanın yaradılması məqsədini
daşıyan park, o cümlədən burada quraşdırılmış külək generatorları, günəş
panelləri, açıq və qapalı şitilxana kompleksi haqqında məktəblilərə ətraflı
məlumat verilmiş, onlar üçün elektromobillər və velosipedlərlə gəzinti təşkil
edilmişdir.
Olimpiada iştirakçıları ağac əkmiş, xüsusi lövhələr üzərində öz
adlarını, ölkələrini və tarixi qeyd etmişlər. Onlar “Ekoloji Park”ın “Xatirə
kitabı”na ürək sözlərini yazmış, xatirə şəkilləri çəkdirmişlər. Qonaqlara
hədiyyələr verilmişdir.
Sonra olimpiada iştirakçıları Qala kəndində
yerləşən “Qala Arxeoloji Etnoqrafik Muzey Kompleksi”nə getmiş, orada qorunan
eksponatlar və xalq sənətkarlığı nümunələri ilə tanış olmuş, ayrı-ayrı
sənətkarlıq nümunələrinin hazırlanması prosesini canlı seyr etmişlər.
